قصيدة وصية للصحاب ابراهيم فرج 2021
لو مُت بكره يا صاحبي عرفهم
اني لا شيلت ف يوم ولا كرهتهم
كان نفسي كل الناس يحبوني
يدوني فرصه اترمي وسطهم
خلي اللي عاوز يعيط يعيط
وسيب اللي يبكي يترحم عليا
انا وانت لما قسّمنا الدموع
كات دمعه موجوده ف عينيك
والتانيه موجوده ف عنيا
اطفال ف نفس التخته ف اعدادي
صاحب حقيقي مش قليل الأصل
سبحانه ربك عدل مقسمناش
ودخلنا ثانوي وكنا نفس الفصل
اتنين صحاب بيرازوا ف الدنيا
والدنيا كل يومين تخوفهم
يدخل حياتنا الناس ونخسرهم
علشان بتيجي الشده تكشفهم
بدلنا طول الوقت ف هدوم المدارس
والكوتشي فاكره انا وانت دوبناه
اتقال كلام ف الضهر من ناس يكرهونا
بس احنا لجل العشرة كدبناه
كنت اما بتعب او بحس ب يأس
تدخل تشيل من جسمي اوجاعي
فاكر زمان اتجبست ايدك
وانا لسه الم الكسر ف دراعي
لو مُت بكره يا صاحبي متسبنيش ..
الموت مشاور ليا واختارنا ..
طول مانت عايش هبقي انا اللي بعيش
وانا بشكرك علي كل اسرارنا
علي كل غنوه وياك ف المواصله
علي كل سحله انا وانت شوفناها
عيط عليا وفضي ف عيونك
قول النهارده انا ليا صاحب مات
وساعتها تبقي بتدي درس كبير
للناس عشان بيفكرونا اخوات
لو مُت بكره يا صاحبي هتلاقي
الديك حزين مادّنْش مع فَجرُه
هتلاقي عالم كدابين وخلاص ..
وبموتي عادي ساعتها هيتاجروا
ف بشَهّدك ..
اني بريء من كل من تاجر وباعني
انت الوحيد اللي لما هموت تودعني
وابقي افتح انت موبيلي واكتبلي
وف عيد ميلادي ابقي احتفل بيا ..
وان كنت قادر تمشي ف الدفنه
ادخل وصلي بالجنازه امام
علقلي صوره كبيره علي مكتبك
عد الليالي واحسب الايام
ازرع يا صاحبي الورد علي قبري
طلع عليا ف المياتم قُرص
اعملي صدقه باسمي ف الجامع
خليك معايا لو تتيح الفرص
بلغ ابويا اننا غلطان
علشان عاندته ف حاجه قررها
اسأل علي امي وروحلها علطول
خليك مكاني وروح وصبرها
افتح دولابي ونقي ف هدومي
يمكن تلاقي جاكتك جواه ..
دلوقتي يبقي لما واحد مات
موت ساعتها حد تاني معاه
اطلبلي دايما قهوتي مظبوط
او زورني كل ما بوحشك ف السر
واقرالي فاتحه ودعوتين صادقين ..
وبلاش دموعك فوق عنيا تفر
انا عيشت بيك ومعاك وآمنتك
كنت انت صاحبي وقلبي ولساني ..
لو مت بكره يا صاحبي عيشني
دي فرصه حلوة انا مش هموت تاني
