كلمات قصيدة اخويا رحمه وليد 2021

انا اخويا ضهر وسند
بالرغم انه صغير بس السنين قسماه وجيه عليه زياده ..
طول عمري بعتبره بإنه طفل رضيع ..
و انا ببقى ليه دادة
وتيجي ساعه الفجر
يسبقني ع السجادة ..

والله ضهر وسند ..
وبيبقى ليا العمد وقت اما بحتاجه
ووقت اما اكون وياه ..
انا ببقي ليه تاجه

دي كفايه مسكة ايده لما بكون زعلانه

والاقيه بيضحكلي ماله الجميل زعلان ؟!
انا قلبي بيتكسر لما يكون شقيان ..
راجع وهلكان وملامحه بهتانه
انا كنت بير شيال لكل أسراره ..
وكنت أداري عليه وقت اما حب فلانه ..

انا اخويا هوا الأب .. التاني بعد الأب
طول عمره شايف غلب ف شبابه حد عجوز ..
شايل حمول غيره
طول عمري بدعيله وبقوله يستحمل ..
انا عندي اموت اهون
ومشوفش تكشيره

انا اخويا ليا الضهر ..
انا كنت ابان زعلانه والدنيا سودة ف عيني ..
لو كان يغيب عن شهر ..

واما يكون راجع يلاقيني بستناه ..
بياخدني بالحضن وميقولش غير وحشاه ..
وبدون م يتكلم انا ببقي فهماه
ف حضنه شئ بيدفعني اني أميل للبكا
معرفش ليه ؟!
انا اصلي ليه وبيه ..
وقت اما اكون محتاجة مين ليا غيره الاقيه ..

بفرح اوي لما الاقيه بيقول اسمي وبعده يقولي مفيش ..
بيفتح مجال للضحك بشاغلني واشاغله
ومن وسط شئ شاغله عمره م ينساني
وفاكرني ف مشاغله

طول عمره لماح
طول عمره بيفهمني
وقت اما اخبي حاجات الاقيه بيسألني ..
مخبيه ايه عني ..؟!

ونسهر بدون توقيت
وكلامنا مبيخلصش ..
انا بسكت مبنطقش
لما يكون غيران ..
وغيرت عنيه ظاهرة بتشع منها النار ..

ف قساوته حد حنين ..
انا عمري م اتخيل انه يسيبني ف يوم
ويكون بعيد عني ..
من قلبي بضحك لما اسمعه بيغني
والاقيه بيبص عليا ويقولي ايه مش حلو ..!
اقوله دا يجنن ..
طول عمره حد حنين

عشقه عنيه ف قفلتها لما يكون بيضحك

والدقن مرسومة ك لوحه بتفسر معني كلام الحب
بتمنى ليه من قلبي ينسى سنين الغلب
دايما بيكون جمبي وبحتويه بالقرب ..

عشقه عنيه العسلي ف وقت الشمس م تفوته ..
انا كارهة وقت سكوته لما يكون بيفكر ..
دا قلبو داا جوهر
حرام يشيل الهم
حرام يكون مهموم

دا قلبو كان مغروم بحب من حوله
الغلب دا عاوزاه يكون له شئ جاهله ..
عاوزاه يعيش لي ملاك لحياته يتأمل
ورسالة مني إليه بقوله يستحمل
بكرا تروق دنياك
هنعيش وهنكمل