كلمات قصيدة الغربة ابراهيم فرج 2021

اول مكالمه ..

خريج تجاره بقول ست سنتين او تلاته ..
سافر بقاله تقريبا سنه ..
كان هو ابنهم الوحيد ..
شاف السفر اول طريق للنغنغه ..
هدفه الوحيد اللي لسه محققوش اتلغي ..
امه : واحشني يا احمد ..
وانتي كمان وحشاني والله ..
جاي امتي ..
مالك ياماما مش لسه سألاني السؤال ده مرتين العصر ..
مانا قولتلك .. كل الطرق ف القلب بتوصل لمصر ..
عاوزين فلوس ؟
والله يا احمد واحشنا ونفسنا نشوفك ..
ترجع وبس وكل حاجه هتبقي زي الفل ..
حاضر يا ماما .. بكره هرجع ، سلمات لبابا واخواتي البنات
سلام .. سلام

المكالمه التانيه كان خالد بلال
شغال محاسب ف بنك واستسمار خليجي ..
ابنه الصغير كبر وبقي بيروح وييجي ..
مراته بقالها ست سنين سايبها لوحدها ..
الو ..
ازيك يا بابا ..
ابعتلي بكره مصاريف الدراسه ..
وكمان فلوس ابعتها لبتوع الصيانه ..
سايب العربيه ف التوكيل اسبوعين ..
ومراته كل اللي شاغل بالها ..
انها كل يوم بتجوع جوعين ..
ارجع يا خالد
الدنيا من غيرك كئيبة ..
حاضر يا نور ..
بكره هرجعلك خلاص

تالت ورابع مكالمه ..
كانو ناسيين اغترابهم ..
فاقو لما ملك الموت ضربهم ..
الو ..
البقاء لله ..
ف مين ..
ف السنين .. ابوك اتوفي يا محمد تعالي ..
خلصت خلاص .. اللي انت كنت مسافر

عشانه اتوفي دلوقتي ..

مات الكلام ..

وانتهت المكالمه علي العياط
وهييجوا بكره

اخر مكالمه ..
واحد حبيبته ماستغنتش عنه ..
كل اللي كان ف جيلها اتجوزوا قبلها ..
وهي بتحبه واستنيت عشانه ..
وحشتني ..
وانتي كمان ازيك ..
زي ما قلبي سابني بنفس اللهفه ..
هانت هنزل بكره خلاص ..
وساعتها ف حضني هينشف منديلك
اول ماصحي من النوم يا حبيبتي ..
وهحجز طيارتي وهنزل وهجيلك

اول ما سافر كان فكرها فلوس ..
سنتين تلاته وتتعدل حالته
زي اللي ماشي شاف قصاده فانوس ..
اول ماوصل الشغل كان كتب استقالته
ساب اللي ضامنه عشان كان قليل ..
ورايح برجله وطول الطريق راضي ..
دعك الفانوس وعينه بتطلع قلوب ..
وساعتها عرف ان الفانوس فاضي ..

يا ريتني ما مشيت م البلدي ..
وفضلت قاعد هنا وزرعت ارضي
يطلع المحصول هبيعه ..
وانام وسط اهلي مبسوط ومرضي

اربع سنين ف الغربه موصلتش لحاجه ..
ضيعت عمر بحاله علشان الكاشات ..
اربع سنين وانا لسه ف دماغي السؤال
ايه اللي ممكن احققه لو شغفي مات

ده انا كنت جاي للبلدي بقلب ومفتح ..
ولحد فجأه م دبل الورد اللي فتح ..
طلعت فلوسي كلها ملهاش اي قيمه ..
قدام خبيزك ياما والاكل ف صحونك ..
قدام ابويا وحكمته ورده السليم ..
مستشفيات البلاد اللي بره كلها ..
مفهاش علاج للوحدة والوحشه اللي فيا
انا نفسي انام علي فرشتي واقفل عيوني
من غير ما قلبي ف صدري يوجعني ..
من يوم ما جت للغربه دي ..
وانا كل حاجه ف عيني مش زي اما كانت ..
الفلوس مش كل حاجه ..
والجري مش نص الجدعنه ..
مشوفتش خواتي بقالي اكتر من سنه ..
وحبيبتي لسه بتتسأل انا جاي امتي ..
فيه ناس كتير انا سيبتهم ع الامل ..
وهما وقفوا ف ضهري وساعتها اختاروني
فيه نغزة كل ما تيجي يبقي بيوحشوني
رجعوني للاهلي .. مش عاوز فلوس ..
رجعوني لبيتي ولارضي وعيالي ..
حد تاني ييجي ويسافر بدالي
الغوا اي عقود عمل ..
واسحبو التأشيره وامنعوا الاختام ..
لو كل حاجه كانت قيمتها بفلوس ..
القاعده وسط اولادك بكام !!
النومه ف سريرك ..
الواقفه ع الشارع بتاعكوا
القاعده بالليل ع القهاوي ..
الجري ف الحجز الخماسي ..
انا قولت بس هفكرك

لو كنت ناسي ..
بدلة الغربه مش جايه مقاسي ..
الدنيا لو بره البلدي ناويه تشتي فلوس ..
انا هبقي واحد م اللي هيشيلوا الشماسي
انا جوه بلدي ف فرقتي هلعب اساسي ..
الغربه زي الفقر ف الاخر
كلها نفس المآسي ..
مش هكمل هنا وهرجع لاهلي ..
انا سيبتهم وطاوعت جهلي ..
ملعونه اي عماره ف خيالك بنيتها ..
ورسمت عشيه جديدة ورميت القديمه ..
مليون دولار قدام حبيبتي وحضنها ملهمش قيمه ..
هي ماسغنتش ثانيه ..
كل اللي كانوا ف جيلها مخلفين دلوقتي مش فارق معاها ..
انا لازم ارجع واعيش اللي فاضل معاها ..
وسط ابويا وامي ف البيت القديم
جمب اخويا ونبقي كتف ف كتف ..
ابقي ضهر وعزوة لاخواتي البنات ..
دلوقتي انسب وقت للفوز بالحياه..
فيه حضن عشت سنيني مستنظر لقاه ..
فيه خروجه لسه مروحتهاش ف القاهره
او قاعده حلوه الفجر ف استانلي ..
او اكله حلوه وبعدها نطلع نحلي ..
كل الحاجات اللي لازم نعيشها ..
مع ناس بتحفظ ملحها وعيشها
مانا مش لوحدي الناس بحالها ظروفها مكتفاها ..
وانا بلدي مهما بلف ف الاخر
عمري مالاقي حضن ف الدنيا ف دفاها

خمسه قاعدين ف شقة ف دوله من دول الخليج ..
قفلوا المكالمات باتفاقهم للنزول بكره ..
طياره طالعه من المطار العصر ..
تقف الساعات والعقارب ..
اول ما بتقول المذيعه ..
العالم بحاله بيقفل الطيران
و بينتهي الامل الاخير ف الرجوع علي مصر

كان صوتي عالي وكنت متعصب شويه ..
ولقيت ساعتها سواق التاكس كان ركز معايا
عينيه جت ف عيني اول ما بصيت ف المرايا ..
قاللي الحياه والعمر مش لعبه ..
علشان نضيع لحظه ف مكان مش مناسب ..
نزلت شنطي وروحت للشباك
ووقفت افكر يجي ساعه هناك ..
كل اللي دار ف دماغي كان فعلا ف وقته ..
قبل ما يسرقني عمري ف انا فعلا سرقته ..
وف داهيه كل فلوسي قدام اني اعافر
سأل الموظف مرتين .. اختملك الفيزا
ف التالته قولت استني .. انا مش هسافر