كلمات قصيدة دايرة الاكتئاب رحمه وليد 2021

مالك يا صاحبي ومال وجع روحك
شكل الفراق ظاهر في نن عنيك
عمال يا صاحبي تداري ف جروحك
وانت اللي جرحك هدفه كان بإيدك ..

حبيت في ناس وآمنتهم
وفتحت ليهم حضنك الواسع
وجريت عشان تثبت لهم انك بتعمل اي شيء نافع
فاهمك خلاص ..
والمشكلة واحدة

مكتوب علينا الغلب والتفكير والتوهة والوحدة
مكتوب علينا السهر والإشتياق والحزن

الدنيا دي ضيقة وقلوبنا ما تسعهاش
انا جالي منها كتير
بس اللي عوزته ما جاش

حبيت كتير جدا
وفي كل مرة بتنتهي اكتب قصيدة عن الفراق واحكي
واشرب ف دخان وانفخه ف وش الوداع
ما بقتش تفرق مين فضل او مين اللي باع

عشت بضحك للسنين علشان تعدي
عمري مرة ما اخدت منها
كنت طول الوقت بدي

بدي للناس الأمل
وانا كنت اول محتاجينه
بدي صبر وبدي قوة ..
وكنت اوزع ف اهتمام
عمري نفسه سايبه يجري
حتى مش بحسب له كام

كنت زيك
كل حاجة عملتها وملقيتش حل
عشت فترة ف عزلتي
وكنت بحضن قهوتي ف عز اشتياق
شخص تايه بحكي عنه بس من دلوقتي فاق ..

السجاير
بنت شيالة هموم
كنت بحكي معاها دايما
هيا بس اللي مش بيجيلها نوم
حتي لما تدوس عليها
تنحني وترجع تقوم

عشت ف الأوراق سنين
وكتبت عن حزني وكتبت عن حزنهم
وكتبت عن جرحي وكتبت عن جرحهم
وكتبت الآمي وكتبت الآمهم
وكتبت بلساني وكتبت بلسانهم
وما زالو على حالهم..

الحزن خيمة مغيمة ع الكل
ولا اللي غايب رجع
ولا الجراح بتطيب
كل اللي عدي نصيب
ومفيش دموع هتغيرك
هتموت ف وقت ما تلقى ماضي
وحزن عمال يكسرك ..

ياما شوفت صحاب ولمة
بس كنت أبعد أوام
كنت اخاف م القرب دايما
وكنت بهرب م الكلام
كانوا بيقروا الحزن فيا
ويفسروه دايما بكفيهم
جرحوا فيا كتير لكني
كنت بعمل مش شايفهم..

شيبت ع الأحزان خلاص
قلبي نحس م الهموم
ناس بييجوا وناس يفارقوا
وناس ريحيتهم ف الهدوم ..

ياما كنت اسهر
واغرق فرشتي بدم البكا
كنت بحكي معايا دايما
وعمري م ازهق م الكلام
كنت ببكي ف حضن نفسي وف النهاية
طفل عيط ثم انام

حاولت انافق زيهم
بس مالقتليش سبيل
عدوا فيا وسابوا بصمة حزن دايمة
كل حاجة بحبها
اختفت مابقيتش باينة ..

بس في اشياء أثرها
لسه ثابت ف المكان
زي بنت جميلة جدا
كنت احبها من زمان
كل شيء كان حلو دايما
بين قوسين يبقي اسمه
(كاان) ..

مفيش اقرب إليك منك
ولا أقرب لروحك روح
فضي قلبك للي جي
عيش .. وسلم
لسة جي ف بكره حلو
وكل حاجة هتبقى غير
اعمل الماضي لوكانده بيدخلوها البائسين ..

لم روايات البكا
وانسى البطل اللي انت شوفته بيشبهك
وانسى حبيبة البطل اللي انت قولت
ياريت يكون لي زيها
دخلت نفسك جوه دايرة الاكتئاب
مابقتش قادر حتى تطلع منها

انا كنت زيك
بس مالقتش اللي زيي يجي مرة يقولي فوق
فضلت أحزن ثم أحزن ثم أحزن
لما صار الفرح فوق
مابقتش ايدي تطول تجيبه
زي ما بطول اي شيء بيكون بعيد
فضلت أحاول ثم أحاول ثم أحاول ..
لما جبت الفرح تاني من جديد