كلمات قصيدة سبعة مارس عمرو حسن

مع قفل اخر باب
وقت اختلاط الأعادي بزمرة الأحباب
وانا درجة من سلَّم عَشَم
مكسورة بإيدين اكتئاب
ما لقتش غيرك
وقت الرماح ما اتملكت مني
والدنيا كشفت وشها البايخ
مانكرش إني قبل ما الجأ لك
شديت خيوط التجربة للحرف
ومشيت لحد الطرف
وقبل روحي ما تتمنع من الفرح
قبل فعلي ما يتمنع من الصرف
انا كنت جاي الدنيا مليان بالندى
قلبي السواقي الخضرا وعيوني المدى

وضميري سعي اللي ابتدى ما وصلش
حصّلت أملي وللأسف ما حصلش
واديني جيت لك في احتياج لأمان
أمان لا جالي مع الصحاب والوقت
ولا جالي بالحب ولا اللجوء لمكان
ظني في سليمان
لما ما داسش على نمله
خلاني أقول فما بال إله سليمان
جيتلك بريء من المرض
لكن مصاب بالعرض
وفي صدري حادثة قديمة ما حكيتهاش
بيني وبين الانتحار كسرة
وفي ايدي فتحه وفعلها ما أتاش
مضطر خايف أو كفيف شايف
راجف شفايف أو قتيل بالشك
مهتم عارف منطوي جارف

داير لفايف درب منك لك
لا في إيدي سيف
ولا في الخيال حيلة
فك البراح سكه ولما سكه اتفك
طمنني زي اللي اتطمننوا ومروا
وعِّيني عيني ماليها حزن وعك
أنا مين حبايبي ومين عدويني
الدمع حاجب عيني وعِّيني
امتاي كيفي وفيني وفيني
ركضت سنين وقلبي داق واتدك
قلبي يتيم السؤال
روحي احتلال
والدنيا محض جدال
والخوف عليه الرك

واقف على قمة جبل
محتار مابين حلين
كلاهما شكين
وكلاهما وحلين
لولا ان غضبك جم
وانت النهاية الأهم
لكنت نطيت من زمان
من ساعة الأصحاب ما اتحوّلوا سكان
والدرب ضاق عالغلبانين ملوا
من ساعة الأصحاب ما قلوا والرعاه ضلوا
قبل الحروب الكبرى
غزوات الفلوس
قبل النفوس ما تهج من ذات النفوس
والدنيا تبهت زي درب طويل
لكني متمسك بحبل إيمان
مازلت متمسك بحبل إيمان
وصلي في دوام الوصل
منك إليك وصلان
انت حبيبي الوحيد
وانت المكان اللامكان
انت المسافات اللي مش ممكن أقدرها
وانت السبيل اللي مش في خيالي أخسرها
انت طريق الحب
متع الدرب وقف الحرب
وبإيدك انت بتندلع نارها
سويها علشان الحساب طول
وفي ناس غلابه مظلومين مساكين
ناس لسه بني ادمين
بيغيبوا عنك بس مش ضالين
مستنيين ضحكه يحسوا أمان
أو في انتظار دعوه يردوا آمين

انا منسحب منها
بكل ملاعينها
لا ايد تعين ميلها
ولا قيد ملا عينها
سايبها بسنينها
وبكل شياطينها
مش معتذر عن شيء
ولا معتزل من شيء
انا منعزل من الكل
ماشي لضوء الضل
أملى في حياه بحياه
نجيني من المعاناة
واوهبني نعم غياب