يا فولانه
يا غاليه يا بنت فولان
يا رصيد الافراح والاحزان
الناس جايه بتنصحني علشان
مفضلش بروحي الخوافه
وقالولي انك مش حباني
وانك عايشه في عالم تاني
وانك من يومك نسياني وبنا مسافه
وقالولي ان العين الشايفه
مش زي العين المتشافه
وقالولي في ١٠٠ واحده تريدك
واملها تكون ايدها في ايدك
وقالولي الخطوه اللي تفيدك
تنساها وترجع تتعافي
وقالولي كتير، وانا مش مهتم
انا حبك روح وطبيعه ودم
بالكيف والكم، وده نصيبي
وانا حبك علشان انتي حبيبتي
مش لجل تقولي انت حبيبي
جيت الدنيا، وجيتي معايا
مزروعه حكايتك جوايا
وانا عيل في الفصل رأيتك
واتخيلت ملامح بيتك
وامشيت في الدنيا وانا بحبك
فانا قبل ما احبك
قبل ما اقابلك حبيتك
وانا عيل في الفصل رأيتك
واتخيلت ملامح بيتك
وامشيت في الدنيا وانا بحبك
فانا قبل ما اقابلك حبيتك
دلوقتي الناس الصياده
بيقولوا بحن وبتغاضى
وانا يعني بحبك بارادتي
دي مشيئه وتسليم واراده
العيب اللي الناس شايفينه
احاسيسي موافقه وقبلينه
والحب مصيبه وخبطة راس
ومفيش تعقيب على قوانينه
الحب ملوش حسبه ونسبه
ملهوش منهج ننقل منه
ولا مِنك ولا ممكن شبهك
ولا حتى سنك من سنه
الحب اذا اتمكن بيبان
ويكون اعلان عالملاغيه
وحمام الشوق اذا كان بيعود
كان كفّى وفاض كان ملى غييه
وانا دية قلبي اذا كان ولهان
حبة عرفان على ملاغيه
حبة عرفان على ملاغيه
يا صاحبي
الحب لو اتمكن بيبان
بيكون اعلان عالملا/غيه
وحمام الشوق لو كان بيعود
كان كفّى وفاض كان ملى غييه
وانا دية قلبي اذا كان ولهان
حبة عرفان على ملاغيه
بتروح مسحوب من غير ما تتوب
وبتقبل حبك على عيبه
وتكون مخطوف زي المشدوه
قدام ساحر له ألاعيبه
ولا فارق ناس بيقولوا ملام
وبيرموا كلام او بيعيبوا
الحب اذا قاد عمره ما بيقل
بيهين ويصون ويدين ويحل
بيفوت ويعود ويسوق ويضل
فمفيش حب تمامه كرامه
الحب ده كيف والكيف بيذل
كل اللي اتقال عنك عارفه
كاتبه وصرفه وبردو راضيه
سبحان الله
حبك حب اللي ملوش ردة فعل
منغير ما استنى تحبيني
وده عيا ملوش في الدنيا علاج
غير دعوه لربنا يشفيني
فالعمر بحاله في قصة حب
هتِقلب فكرك وكيانك
هتغير فيك وهتبقى ماضيك
وتشقلب فيك وانت مكانك
وبسبب القصة دي ياما حاجات
هتكون فرحك او احزانك
واحده اذا اسمها يتقال تترَب
واذا كنت عجوز هتعاود شب
هتكون مجنون وعبيط ومدب
هتعاشر نص بنات حوا
انما واحده بيعنها هتتحب
فبجد وفعلا وامانه
مهما الواحد حب وعانى
فده مش ذنبه
واذا حَب جديد
ما يكونش حنينه اليه خيانه
اتخن واحد ليه نقطة ضعف
له واحده بتملك مفاتيحه
وشموع جلده لو شافها في يوم
بيقيدوا ويتطفوا ويسيحوا
وتكون السر في تطبيبه
وبتبقى السر في تجريحه
فانا حبك انما مش عاوزك
مشتاقلك انما مش عشمان
انتي اللعنه الكامنه في وجعي
والعمر اللي انا ضيعته زمان
فسلام
وفي بالي ومشتاقاك
يا فلانه يا غاليه يا بنت فلان
