كلمات اغنية غاية المصلاح ماجد خضير

خاطري لا هزه الشوق في تالي نهار
يستبيح النفس حتى تبيح اسرارها

كل ما ذعذع هوى الغرب فكيت الزرار
والطواري من ضلوعي تولع نارها

ضيقةٍ بين الحنايا لها شعله ونار
ما تفرج لين اسج القدم في ديارها

راكب اللي كل ما يعطي خشوم الزبار
ذيبٍ اشهب كل دارٍ يدوس اخطارها

لاسرى شفت المسارين قدامه مسار
والديار يحيي اطلالها وأشجارها

ماحلى السجات في شف نابية الفقار
عقب هلت كل غرّا غزير امطارها

المزون اللي بردها كبر بيض الحرار
خلت الوديان تجري سوات انهارها

يشتعل برق السحابه مثل قدح الشرار
والرعود اتحن في يمينها ويسارها

في ديارٍ حبها ما يقارن في الديار
شمة النسناس فيها دواء من زارها

هي غرام اللي من أول يعنوّن المهار
عزوةٍ من سالف الوقت تكرم جارها

غاية المصلاح في خايعٍ كله خضار
مختلط شوف الزماليق مع نوارها

مدهل اللي شفها دونه تروح العمار
من قديم ايامها ما نقص مقدارها

في أول البدوان ترعى عذيات الديار
في هواها ما سمعنا العرب واشوارها

عندها ماني بغابط هوامير العقار
السعاده عندي أهم من مليارها

شف بالي كل ما روحت نوطاً خيار
خطو بكرٍ من ولعها تكب احوارها

تل قلبي كل ما قامت اتّل الحوار
في اول الزعجول دايم هذا معبارها

تنتل الجندوب وتعلقه والمشي حار
من غياها ما تخلي يتله غارها