ماتعيش القصايد في رحا من قرا
قبل مولد قصيدة كم توفى شعور
كنت أحيك السوالف لين صوتي سرى
وصرت أدور لصوتي أي سكة عبور
آخذ بخاطر اللي خاطره مابرى
غصب عن عين قلبي صار قلبي صبور
الحبايب منافي والرفاقة ذرى
جعلني فدوة اللي للمواصل شرا
واللي أقفت عيونه بالغياب معذور
آه وش حيلة اللي حط همه ورا
وكل مالد شافه يسبقه بالحضور
لين مساه حزنه بالرضا والسرور
إنت مالك بصدري والضلوع خشرا
غير وجهك وهمس بالمحاني جهور
قد ماني بكيتك بالشعر لاطرى
وقد مادم قلبي لاذكرتك يفور
صرت أنا والأغاني والقصيد عشرا
لين خفت العواطف من غناها تبور
إن ظلمتك بغيابك من تحبه ترى
المسافة قصيرة والليالي تدور
دام الأعمار تفني والجسد للثرى
من يبيح السنابل لو تموت الطيور
