كلمات قصيدة عكازي اتكسر رحمه وليد 2021

محتاج لأهل علي الحقيقه
مش قرابه علي الورق ..
محتاج لحد يكون في وقت الضعف ضهر ..

نفسي انام من غير ما اعيط
ع اللي كانو عزوه ومحبه وحنان ..
نفسي انام من غير ما اعيط
ع اللي فارقوا وغابو عني من زمان ..

محتاج لأهل يسامحو حتى لو في 100 خلاف ..
محتاج لإيد تمسح دموعي لما ابكي في يوم وأخاف ..

محتاج لأهل ف وقت ظلمي يسعو ورا حقي بضمير ..
محتاج لحد يشوف نجاحي يكون سعيد ..
محتاج لأهلي جمبي دايما مش زياره كل عيد ..

محتاج ل أهل بنيه صافيه خاليه من كل العناد ..
نفسي أحس بإني روح مش اسم في شهاده ميلاد ..

محتاج لعم بعد ابويا يكون سند ..
محتاج لخال يبقي ضلي للأبد ..

محتاج ل أهل بقلب أبيض م الحرير ..
نفسي لما انظر ل لمه عمري مره في يوم ما أغير ..

محتاج ل عكاز لما اقع أسند عليه ..
كل ما ابني سور محبه ييجو بردو يهدو فيه ..

خليتو لي أيام فرحنا تتنسي ..!
خليتو لي كل الحنان يقلب قسي ..!

هتفوقوا امتي وتمنعوا قانون الغشم ..
دا انا لسه أملي علي العشم في اللمة زي زمان ..
كل اما أقرب تبعدو وتقفلو كل البيبان ..

نفسي أحس بإن سني هوا هوا مش ضعف سني سنين عليه ..
نفسي أحس بإن شكلي هوا هوا مش طفل والأحزان عليه ..

محتاج لقرب بدون بعاد ..
او حتي لما يقربوا ويفارقو فجأه يبقو يعطوني الميعاد ..

مش حمل كل يومين وجع
عاوزكو وقت الضلمه نور ..
الكون دا كلو مره واحده وارواحنا نهايتها القبور ..

انسوا اللي فات وكفايه بعد وقربوا ..
ليه لما بصنع اي حجه لقربنا نهايتها بردو بتهربوا ..

لي كل مره عتابنا يقلب 100 خصام ..
ليه لما بسند حيط وجعنا يهدو 100 مليون حطام ..

عاوزكوا كتفي مهما يضعف تسندوه ..
عاوزكوا لما الإبن يغلط تبقوا جمبو تفهموه ..

عاوزكوا قوه اتباها بيها وسط ألف بيشمتوا ..
وتبقوا بردو النصر ليا جمب مليون م العدو ..

والله قلبي ما فيه كفايه من الكلام ..
بس مش لاقي اللي يفهم ولا لاقي حد بيسمعوا ..

ان مره تسأل راحوا فين ..
هرد اقولك موجودين بس دا حكم القدر ..

وإن قولت يوم عكازي فين ..؟!
كان ليا عكاز واتكسر.