علي ضهرك إتعكز
وبضلك إتدفي
لو حتي علي وشك
هتقع وتتكفي
ماتفرحشي باللمه
والهيصه والزفه
بحر القلوب غدار
ويهد ١٠٠ دفه
اللي النهارده معاك
بكره هايبقي عليك
ويشوف بعينه أذك
يشمت ويفرح فيك
واللي بروحك تفديه
يفرط عادي فيك
إتغدي بالأيام
قبل ماتتعشي بيك
خاف م اللي منك حتي لو
علي اسمه متسمي
مفيش حد بقي في زمنا دا
علي حد بيسمي
والكل ع الدنيا اتسرع
وبطمعه متغمي
لا تقولي اخويا ولا ابن ابويا
ولاحتي من دمي
لما النفوس يملاها سوس
هتشوف عجب ياما
الحب يتحول لكره
وعداوه هدامه
واقرب ما ليك حنيته
تقلب علي غشامه
ويغرقك في بحور أذي
ويرميك في دوامه
وش القفص بيغر
بس الباطن فسدان
ماتاخدش بالظاهر
ولا تدي حد أمان
في الناس بلاش تتخم
وتقول فلان غلبان
غير لما يوم تعاديه
ووشه الحقيقي يبان
هتشوف ساعتها حاجات
ترعب تخض بجد
وجحود مابعده جحود
وقساوه مش علي حد
وناس لا فاكره جميل
ولا صاينه عشره وود
هاين عليها أذاك
ومناها لو تتهد
مواضيع قد تعجبك
