سلسلة مفاتيح وولّاعة
تذكرة سينما و كارتين شحن
مناديل ورق وفكة وبتاعة
معرفش جتلي منين
حبة زلط و ودع بنقّيهم
صح وغلط وجنان من الماضي
وحاجات كتير بتتوه وبلاقيهم
غاطسين مع الكفين
في بنطلوني الجينز ابن البلد البرنس
معرفش جنسه ده ايه م الجن ولّا الإنس!
انا وهو صحاب وعارفين بعض
شاربين عرق وتراب عجين الأرض
أوقات في جيبه وصل وساعات ورد
أو برشام للصداع
في بنطلوني الجينز ابن البلد البرنس
معرفش جنسه ده ايه م الجن ولّا الإنس!
طلعتلي مرة ورقة اليناصيب
كتبالي فيها انت سيب يانا اسيب
أيام وعدت فجأة، يلّا نصيب
وخلاص ضاع اللي ضاع
مواضيع قد تعجبك
