بلد عايش فيها الغلبان
مش باين كأنه شفاف
خايف يتكلم يتهان
وانا هتكلم ومش هخاف
وهقدم نفسي علشان الناس اللي مش عارفاني
اسمي محمد خليفة والحطابة عنواني
وهقول كل اللي في نفسي
انا مش هتكلم عن نفسي
هتكلم ع الحطابة
مصنع الرجالة
الجدعنة والطيابة
احسن رجالة
دي منطقتي والفخر ليا
الحطابة قديمة يا ناس
فيها اماكن تاريخية
بتثبت إن احنا الاساس
جدي وابويا إتولدو فيها
وانا إتربيت في حواريها
عارف تاريخها وتفاصيلها
وعارف كل اهاليها
اتعلمت فيها الاصول
إني اكون عن جاري مسئول
والناس الكبار اللي فيها
بسمع كلمتهم على طول
وجيراني انا منهم
وفاهمهم عاشرتهم
عايش مع احلى ناس
متطمن ومرتاح لهم
الحطابة فيها اخلاق
وحب وتسامح وخناء
من فوق جبل الحطابة
شوف كل حارة وكل زقاق
درب الوسطاني والصهريج والدحديرة الوسعاية
والخوخة والحرافيش و كل حارة ليها حكاية
درب اللبانة والتيكية
والمحجر والمنشكية
وشارع المطلع الكبير
والقرافة باب الوزير
والكومي والمرستان سيف اليزل درب النخلة
والعمومي باب الوداع شارع بيودي ع الاخرة
يعني اخرها تراحيل
و أولها تراحيل
وما بينهم القبة
محطوطة على سور جميل
فيها الشيوخ فيها العصابة
فيها سبيل وشجرة وخرابة
الوحشين قليلين
والحلو اكتر في الحطابة
فيها دكتور ومحامي
وفيها تاجر مخدرات
فيها بلطجي وحرامي
واللي رياضي واخد بطولات
الصح ماليها
والغلط فيها
وكل منطقة
فيها وفيها
ناس فاكرين الحطابة خطر جهل وخطف وإدمان
وجيراني فيهم استاذ وموظف وصنايعي وفنان
في ناس بيعرفو اني
م الحطابة يبعدو عني
بس انار يحتي مش وحشة
طب ليه بيقرفو مني ؟
ألفاظي محترمة إسلوبي راقي في كلامي مش بَعُك بحب
النظام
وبتابع الدنيا على جوجل وتويتر والفيس بوك
وانستجراوم
نفسي أثبت وجود
أفكاري ملهاش حدود
انا عايز الناس يعرفو
إن انا فعلاً موجود
ياللي ماتعرفنيش
ماتألفش ماترغيش
إسمع مني ماتسمعش عني
بعدين تحكم عليا
ماتقولش صايع انا حقي ضايع
عايزك تحس بيا
الباشا قفشني وكلبشني اول ما يشوف عنواني
قال لي طالما م الحطابة تبقى مجرم وجاني
ومابشربش السجارة
ومابكسرش الاشارة
وماليش في حاجة يا باشا
وماتفتكرش الظلم شطارة
ع الحطابة يجو فنانين
بيمثلو وبيفضلو قاعدين
وبنعاملهم احسن معاملة
نطلع في افلامهم وحشين
الحطابة منطقة أثرية
حكومة خلوها عشوائية
واجبرونا نبني بيوتنا
من غير تصريح ولا سلمية
افهمونا يا محترمين
سكانها مش عشوائيين
هي البيوت اللي عشوائية
علشان مابنوهاش مهندسين
فيها مباني تبع الاثار
مهتموش خالص بيها
وبتتخَلَّع وبتنهار
ومطنشين اهملو فيها
والنادي بتاعنا يا عيني عليه
ولا تنس ولا سباحة ولا باليه
فيه بس ملعب كورة صغير
نلعب ساعة بسبعين جنيه
وبنلعب وبنحكم لينا
والتبديل بمزاجنا عادي
كلنا بندرب نفسينا
عشان مفيش كابتن ف النادي
عايشين كإننا ميتين
قافلين بؤنا مستحملين
بس اللي خلانا اتكلمنا
حكاية المستثمرين
دي حكاية بدأت من زمان
ركزو معانا يا جدعان
من فترة طويلة جولنا قالولنا
مش عايزين هنا ولا غلبان
والارض هتبقى ملك للدولة
او للبشوات وللعتاولة
دي منطقة جنب سور القلعة
موقع هايل وهما أولى
علشان هيعملوها فنادق يا إما قرية سياحية
و قالو مدخل عشان القلعة وقالو حديقة دولية
بس احنا قولنا مش ماشيين
عايشين فيها بقالنا سنين
وفيها بيتنا وشغلتنا
واحنا عليها متعودين
قررو فيها يكرهونا
علشان عايزين يطفشونا
وجربو خطط كتير
إزاي منها يطلعونا
الخطة الاولى ماتبنوش
وممنوع ترميم البيوت
بيتك القديم متصلحوش
لازم يتهد عليك تموت
حجج وعقود ومستندات بتثبت ان احنا اشتريناها
يعني الارض بإسم صاحبها وبيتحبس علشان بناها
تاني خطة كانت لقمتنا
كان خير بيجيلنا ومنعوه
في باب للقلعة ناحيتنا
لقوه باب رزق لينا قفلوه
مبقاش في ناس رايحين جايين
ولا بيع ولا شغل ولا سياحة
وهما لسه مكملين
في المرازية والبجاحة
هدفهم عمره ما إتنسى
والشيطان بيوسوس ليهم
قفلو الحضانة والمدرسة
اللي انا إتعلمت فيهم
قفلولنا الجمعية كمان
وروحنا بعيد نجيب تموين
وماكانش فيها توكتوك زمان
بنروح وبنرجع ماشيين
منعو دخول ميا ومجاري
مواسيرهم مادخلتلناش
بندخلها مخالف إجباري
أو نملى من حنفية بلاش
وإحنا اللي بنكنس الحواري
عامل النضافة مابيجيلناش
وكل نائب جه دايرتنا جه ايام الانتخابات
قال ودوني مجلس الشعب وانا احل كل المشكلات
بعدين يدينا على عنينا
ويتفق معاهم علينا
يفضل قاعد معاهم فوق
ومايسمعناش مهما شكينا
بيوت كتير وقعت ع الناس
وناس كتير عزلو منها
عدد السكان قل خلاص
ودي حاجة هما عايزينها
وفي اللي قالو مهما حصلنا
هنموت على ارضنا
كانو خلاص هينفزو
لكن حكمة ربنا
قامت ثورة يناير
والشعب كله ثاير
حسينا بالأمان
قومنا بنينا العماير
وفرحنا كلنا
ورجعلنا حقنا
رجعولنا تاني اهالينا
رجعولنا اللي مننا
رجعولنا كمان الحكومة بعد الثورة بسبع سنين
قالولنا تاني هتمشو تاني قولنالهم تاني مش ماشيين
مواضيع قد تعجبك
